Рейтинг@Mail.ru
Православная литература в формате WORD (.doc) и духовная музыка - Разное / Общие каноны святым женам

Канон общий преподобной жене

(Из сборника канонов святым женам
М., "Даниловский Благовестник")

Начало канонов (см. Чин чтения канонов)

После "Бог Господь":

Если есть, тропарь преподобной, и Богородичен по гласу тропаря; если же тропаря нет, то читаем:

Тропарь общий преподобной, глас 8

   В тебе мати, известно спасеся еже по образу, приимши бо крест, последовала еси Христу, и деющи учила еси презирати убо плоть, преходит бо, прилежати же о души вещи безсмертней. Темже и со Ангелы срадуется, преподобная, имярек, дух твой. (Дважды.)
Слава, и ныне, Богородичен: Иже нас ради рождейся от Девы, и распятие претерпев Благий, испровергий смертию смерть, и воскресение явлей яко Бог, не презри яже создал еси рукою Твоею, яви человеколюбие Твое, Милостиве, приими рождшую Тя Богородицу молящуюся за ны, и спаси, Спасе наш, люди отчаянныя.

Затем: Псалом 50

Канон, глас 8

Песнь 1

   Ирмос: Колесницегонителя фараоня погрузи, чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.

   Припев: Преподобная мати, имярек, моли Бога о нас. (Поклон.)

   Страстными мя бурями всюду погружаема, и помышлений молвою душу мою колеблему, ко пристанищу тихому Христовы воли, молитвами твоими, преподобная, имярек, направи, яко да достойно тя воспою.
   Девственными добротами просвещена, богоблаженная, имярек, чистому Слову уневестилася еси, поживши пощением божественне, и Того живоносным стопам последовала еси, умерщвление страстей претерпевши.
   Слава: Божественных отец наказанию последовала еси славная, имярек, и сих нраву чисте поревновала еси, воздержанием яко безплотна, и чистотою и девством поживши, преподобная, и истинным смирением.
   И ныне: Божественную ручку и трапезу, хлеб животный понесшую, неделанную ниву, гору святую, Богородицу Деву песньми славим.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 3

   Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
   В небесныя чертоги светозарныя вселилася еси, невеста избранна бывши Вседержителю, исцеления реки источаеши, имярек, страстная нам течения изсушающи.
   Украсилася еси желанием крайним желающи Христа, премножеством благосердия, плотию обнищавшаго, и последовала еси животным Его словесем, житейская вся красная возненавидевши.
   Слава: Позлащенне криле добродетели стяжавши, на высоту небесную возлетела еси блаженная, имярек, яко голубица нетленная.
   Род спасеся, Дево, человеческий благодатию обнищавшаго плотию, из чрева Твоего неизреченно; темже чтим Тя, и благочестно ублажаем, Пречистая Дево Богорадованная.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.)

Если есть особый кондак преподобной, читаем его перед седальном.

Седален, глас 4

   Красотами явилася еси девственно преукрашаема, постнических священных подвиг, яко невеста непорочная Дева Христова, и с Ним в нетленный вошла еси чертог, и красот Его наслаждаешися. Но моли спастися нам от всякия беды, любовию поющим тя.
   Слава, и ныне, Богородичен: Чистая всенепорочная, и неискусобрачная, едина безлетнаго Сына и Слово Божие в лете рождшая, Того со святыми и честными апостолы, мученики и пророки, и преподобными моли, даровати нам очищение, и велию милость.

Песнь 4

   Ирмос: Услышах, Господи, смотрения Твоего таинство, разумех дела Твоя, и прославих Твое Божество.
   Светлое твое торжество, светом сияющее Божия Духа, озаряет души наша верою поющих тя, имярек, преподобная.
   Чудесы божественными уверила еси неведущих Владыку, и к познанию Его возвратила еси, прелести тьму оставльших.
   Слава: Дары Христу принесла еси, чистое умерщвление удов, и труды воздержания, и противу прияла еси Небесное Царство, имярек, и вечнующее наслаждение.
   И ныне: Смиривши спаси мя, высокомудрием живущаго, рождшая вознесшаго смирившееся естество наше, Пречистая.

Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 5

   Ирмос: Утренююще вопием Ти: Господи, спаси ны, Ты бо еси Бог наш, разве Тебе иного не вемы.
   Руце твои преподобно воздвизаеми к Зиждителю, мати, имярек, низложиша вражия шатания.
   Удержав руку твою десную Вышний, наставил тя есть, мати, к небесному Своему наслаждению.
   Слава: Стезю тесную прошедши в пощении, к широте приспела еси райстей, имярек, всечестная.
   И ныне: Иже Богородицу Тя неведущии, Богомати, Света не имут видети, рождшагося из Тебе, Пречистая.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 6

   Ирмос: Ризу мне подаждь светлу, одеяйся светом яко ризою, многомилостиве Христе Боже наш.
   Умертвивши двизания плотская, над страстьми вельми воцарилася еси, и ныне, всечестная, имярек, в безстрастных живеши светлостех.
   Образу Спасову навыкла еси покланятися, славная, делы и словесы твоими спасительная Его соблюдающи учения.
   Слава: Облак тя Христос показа, мати, имярек, дождь источающий животный, верою просящим у тебе, преславная.
   И ныне: Красен паче всех человек, Сын Твой, Пречистая, добротою Божества, аще и плоть бысть нас ради.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.) Слава, и ныне.

Кондак, глас 4

   За любовь Господню, преподобная, покоя желание возненавидела еси, пощением дух твой просветивши, крепко бо звери победила еси, но молитвами твоими противных шатание разори.

Икос

   Струи мне слова даждь, Боже мой, и источник благочиния сотвори мой ум, и благослови язык мой, да воспою Твою агницу, юже венчал еси Ты благостию Твоею; аще бо Сам не даси ми слова достойнаго, како принесу дар нищий, богатней в словесех и деяниих? Тем подаждь ми силу, исповедати ея натрижнения, крепко бо звери победила есть. Но молитвами ея противных шатание разори.

Песнь 7

   Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси, Господи Боже, во веки.
   О доброте тлеющей, имярек, преподобная небрегла еси, смотряющи тамо сущая воздаяния и свет, и славу Божию нестареющуюся и красоту, и божественное селение.
   Мир пременила еси тлеющий премирным животом нестареющим, и временную пищу пребывающим существом, и плотскаго обручника Небесным Женихом.
   Слава: Разум боголюбив стяжала еси, имярек, с плотию ангелом уподобилася еси, бдящи тепле любовию, и поющи: благословен еси, Господи Боже, во веки.
   И ныне: Виждь скорбь мою, Дево, юже ми наведе множество зол моих, и родства огненнаго исхити мя, вопиющаго: благословен еси, Господи Боже, во веки.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 8

   Ирмос: Богоглаголивии отроцы, в пещи со огнем пламень попирающе, пояху: благословите, дела Господня, Господа.
   Украшена сиянием чистоты, и чистым житием просвещена мати, предстоиши Жениху твоему, Христу Богу нашему.
   Болезни различныя уврачует человеков, и прогонит бесовския пакости, тело твое святое, преподобная, во гробе преславно сокрываемое.
   Слава: Священна жертва принеслася еси, и приношение светлое, преподобная мати, имярек, яко кадило благоуханное, всех Владыце Христу Богу нашему.
   И ныне: Без истления Слова паче словесе родила еси, тления всякаго нас избавляющаго: сего ради Тя, Дево, верою величаем.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 9

   Ирмос: Устрашися всех слух неизреченна Божия снизхождения, яко Вышний волею сниде даже и до плоти, от девическаго чрева быв Человек. Темже Пречистую Богородицу, вернии, величаем.
   Припев: Преподобная мати, имярек, моли Бога о нас. (Поклон.)
   Возжелела еси доброту мысленную Жениха, и чисто возлюбила еси Его. Где почиваеши? где ли пасеши? - тепле вопияла еси, да почию у Тебе, и в Твоих светлостех наслаждуся, величающи Твою благость.
   Разум имела еси в твоей души, и смирение, и божественную кротость, веру несумненну, и надежду, и любовь, юже к Богу, всенощными молитвами приближающися Ему, и тамо сущими светлостьми блаженная, имярек, озаряема и просвещаема.
   Слава: Собрашася днесь людие, хвалами возвеличити Господа, возвеличившаго твое святое торжество сие, в немже поминай нас поминающих тя, предстоящи Христу Жениху твоему, преподобная, имярек, и всечестная.
   И ныне: Пощади мя, Боже, рождейся от Девы, и сохранив рождшую Тя нетленну по рождестве, егда сядеши судити дела моя, беззакония и грехи моя презри, яко безгрешен и милостив Бог, и человеколюбец.

   Моли Бога о нас, преподобная мати, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Затем окончание канона (см. Чин чтения канонов)

Тропарь общий преподобной, глас 8

   В тебе мати, известно спасеся еже по образу, приимши бо крест, последовала еси Христу, и деющи учила еси презирати убо плоть, преходит бо, прилежати же о души вещи безсмертней. Темже и со Ангелы срадуется преподобная, имярек, дух твой.

Если есть, особый кондак преподобной, и затем:

Кондак, глас 2

   Слава: За любовь Господню, преподобная, покоя желание возненавидела еси, пощением дух твой просветивши, крепко бо звери победила еси, но молитвами твоими противных шатание разори.
   И ныне, Богородичен: Вся паче смысла, вся преславная Твоя, Богородице, таинства, чистоте запечатанной, и девству храниму, Мати позналася еси неложна, Бога рождши истиннаго, Того моли спастися душам нашим.

Затем:

"Честнейшую Херувим:", и прочее (см. Чин чтения канонов)


Примечание: Общий тропарь читается, если нет отдельного тропаря. Если же есть, то читается отдельный тропарь.



Разное