Рейтинг@Mail.ru
Православная литература в формате WORD (.doc) и духовная музыка - Разное / Общие каноны святым женам

Канон общий преподобномученице

(Из сборника канонов святым женам
М., "Даниловский Благовестник")

Начало канонов (см. Чин чтения канонов)

После "Бог Господь":

Если есть, тропарь преподобномученице, и Богородичен по гласу тропаря; если же тропаря нет, то читаем:

Тропарь общий преподобномученице, глас 4

   Агница Твоя, Иисусе, имярек, зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но яко жертву непорочну приими мя с любовию пожершуюся Тебе. Тоя молитвами, яко милостив, спаси души наша. (Дважды.)
Слава, и ныне, Богородичен: Еже от века утаенное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Затем: Псалом 50

Канон, глас 8

Песнь 1

   Ирмос: Поим Господеви, проведшему люди Своя сквозе Чермное море, яко един славно прославися.

   Припев: Святая преподобномученице, имярек, моли Бога о нас. (Поклон.)

   Сию светоносную память твою почитающему, богомудрая, просвещение ми подаждь, души моея тьму отгоняющи.
   Всю от пелен тебе самую возложила еси Зиждителю твоему, имярек, и огнем воздержания телесныя страсти попалила еси.
   Слава: К высоте мучения, мученице, возшла еси, не пощадевши плоти, и чертогов мысленных, яко дева, сподобилася еси.
   И ныне: Тя небомерную лествицу, на нейже Бог утвердися, человеки небесны соделовав, Отроковице, почитаем.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 3

   Ирмос: Ты еси утверждение притекающих к Тебе, Господи, Ты еси свет омраченных, и поет Тя дух мой.
   Стояла еси пред судищем мучителя, славная, имярек, Христа Творца всех и Владыку, Бога Слова проповедающи.
   Доброта сердечная видимым зраком, славная, имярек, издавшися, тя краснейшую зрящим явила есть.
   Слава: Богатство неистощимо исцелений тебе подаде, отроковице, Христос, Егоже нищету вольно возлюбила еси.
   И ныне: Вещь грехов моих Твоих молитв огнем попали, Мати Света, росу ми божественную оставления носящи.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.)

Если есть особый кондак преподобномученице, читаем его перед седальном.

Седален, глас 1

   Агница словесная Агнцу и Пастырю принеслася еси пощением, мучением же течение скончавши, и веру соблюдши, имярек, темже днесь радостию совершаем, досточудная, священную твою память, Христа славяще.
   Слава, и ныне, Богородичен: Молитвы Твоих раб приими, Богородице, и избави нас от всякия беды, яко рождшая Христа Спаса, Избавителя душ наших.

Песнь 4

   Ирмос: Услышах, Господи, смотрения Твоего таинство, разумех дела Твоя, и прославих Твое Божество.
   Тя иго легчайшее Христово, мученице, понесшую от юности, тяжкое бремя носити пребеззаконнующии осудиша.
   Капли кровей твоих многобожия погасиша углие, лучи же чудес твоих, имярек, страстей вещь попалиша.
   Слава: Выше земли вземся твой огнь, к персем, мученице, возгнетися, возгнещая твое рачение, еже ко Владыце, дево.
   И ныне: По рождестве пребыла еси нетленна, Дево, якоже прежде рождества, юна бо Младенца родила еси, прежде век познаваема.

Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 5

   Ирмос: Утренююще вопием Ти: Господи, спаси ны, Ты бо еси Бог наш, разве Тебе иного не вемы.
   Неизнуренна огнем вещественным явилася еси, мученице, имярек, огнь бо тя сердечный божественныя любве орошаше.
   Удареньми лица, мученице, имярек, украсившися, врагов отразила еси мерзкое неразумие.
   Слава: Протяжена на древе, богомудрая, имярек, любовию Жениха твоего Божественную страсть образовала еси.
   И ныне: Поем Тя, всепетая Владычице Богородице, Бога бо препетаго плотию родила еси, Пречистая.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 6

   Ирмос: Ризу мне подаждь светлу, одеяйся светом яко ризою, многомилостиве Христе Боже наш.
   Сокрушаемо тело ранами, являше правость твоея совести страстотерпице, имярек, ко Христу Богу нашему.
   Висящи высоко, раны, мученице, терпящи, и неуязвенно хранящи души благородие, имярек, достохвальная.
   Слава: Терпяше сосцев отрезание, преподобная, верныя млеком божественнаго рачения питающи, славная.
   И ныне: Человеколюбца рождши Бога, Боголюбивая Владычице, Того моли, геенны огня избавитися нам.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.) Слава, и ныне.

Кондак, глас 4

   Божественная память твоя, имярек, днесь возсиявши явися мирови яко солнце, сказующи житие твое, ты бо воздержанием плотская двизания разорши, и страдания кровию уневестилася еси Христови. Темже хвалящия тя избави от всяких зол, да зовем ти: радуйся, мати преподобная.

Икос

   Отверзи ми устне, преблаженная, богоприятными твоими молитвами, предстоящи Богу, всеславная преподобномученице, да воспою божественное твое житие, и возглаголю достойно страдания твоя, яже на земли теплою любовию совершила еси, и мученица была еси непобедима; воздержания верою исправила еси бдение, и чистоту возлюбила еси. Темже хвалящия тя избави от всех зол, да зовем ти: радуйся, мати преподобная.

Песнь 7

   Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси, Господи Боже, во веки.
   Шум гласа празднующих идеже есть, ликуеши страстотерпице, имярек, с Девами Богу Зиждителю песнопоющи: благословен еси, Господи Боже, во веки.
   Уды сокрушаемы зрящи, имярек, и ногтей истерзание терпящи, принеслася еси Богу жертва, песнопоющи: благословен еси, Господи Боже, во веки.
   Слава: Явилася еси яко лоза Богомудрая, имярек, руце и нозе яко ветви режемы, и нам мысленно вино источающи, сердца утешающее, и страстей отревающее пиянство.
   И ныне: Во всего человека облекся Нескверный, кроме греха, из утробы Твоея, Чистая, пройде Плотоносец. Егоже умоли, верою Тя чествующия спасти.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 8

   Ирмос: Седмерицею пещь халдейский мучитель богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
   Юношески добльствовавши, страстоносице всехвальная, на прелесть воздвигла еси победы, рук бо лишения и ног терпела еси, сосцев же и зубов твоих искоренение, мученице, претерпела еси, в радости песнопоющи: людие, превозносите Христа во веки.
   Всесветла яко солнце девства светлостьми, и мучения добротами облистала еси, и мир просветила еси светолучными сиянии твоего терпения, страстотерпице, вопиющи: отроцы, благословите, священницы, воспойте, людие, превозносите Христа во веки.
   Слава: Оскверненную страстьми душу мою, богоневесто, и очерненную прилоги змия, твоими мольбами от лютых очисти и светлым осенением твоим, мученице, имярек, озари вопити: священницы, пойте, людие, превозносите Христа во веки.
   И ныне: Тя Чистую и Непорочную, дева желающи, непорочно и тело и душу соблюде, страстей подпаления терпением испепеливши, искушения же многих претерпевши мук, и ныне в небесных чертозех ликует с Тобою, веселящися во вся веки.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 9

   Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес; Тем Тя, Богородицу, Ангелов и человек чиноначалия величают.
   Припев: Святая преподобномученице, имярек, моли Бога о нас. (Поклон.)
   На древе повешена была еси, Слова Божия образующи страсть блаженную, и отсечение терпела еси рук твоих и ног, зубов искоренение, языка же отрезание и сосцев, чистая, имярек, монашествующих славо и мучеников украшение.
   Яко невеста украсилася еси добротою, обручившися Жениху страданьми добротворными: внутрь же чертогов световидных яко избранная вселилася еси, носящи свещу девственную. И ныне царствуеши с живущими во веки, имярек, сияющи.
   Слава: Искапают болезни твоя сладость, греха горесть отъемлющу, рака же точит исцелений реки, и потопляет вся страсти и недуги лютыя, в славу Спасову, чистая, имярек, иже по достоянию тя славят.
   И ныне: Понесшаго Тя плоть от Жены, яко позна мученица Твоя, Господи, девственными украшена лучами, и мучения кровию обагрена, Тебе Богу, в след Матере Твоея славно приведеся, яко царствующему тварию.

   Моли Бога о нас, святая преподобномученице, имярек, яко мы усердно к тебе прибегаем, скорой помощнице и молитвеннице о душах наших. (Поклон.)

Затем окончание канона (см. Чин чтения канонов)

Тропарь общий преподобномученице , глас 4

   Агница Твоя, Иисусе, имярек, зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но яко жертву непорочну приими мя с любовию пожершуюся Тебе. Тоя молитвами, яко милостив, спаси души наша.

Если есть, особый кондак преподобномученице, и затем:

Кондак, глас 4

   Слава: Божественная память твоя, имярек, днесь возсиявши, явися мирови яко солнце, сказующи житие твое, ты бо воздержанием плотская двизания разорши, и страдания кровию уневестилася еси Христови. Темже хвалящия тя избави от всяких зол, да зовем ти: радуйся, мати преподобная.
   И ныне, Богородичен: Еже от века утаенное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Затем:

"Честнейшую Херувим:", и прочее (см. Чин чтения канонов)


Примечание: Общий тропарь читается, если нет отдельного тропаря. Если же есть, то читается отдельный тропарь.



Разное