Рейтинг@Mail.ru
Православная литература в формате WORD (.doc) и духовная музыка - Тексты песнопений

Тексты церковных песнопений


Скачать mp3   
Ангеле Божий, хранителю мой святый,
живот мой соблюди во страсе Христа Бога,
ум мой утверди во истиннем пути,
и к любви горней уязви душу мою,
да тобою направляемь,
получу от Христа Бога велию милость.
Наверх
Ангельския предыдите силы;
иже в Вифлееме, уготовайте ясли.
Слово бо раждается, Мудрость происходит;
приемлет целование Церковь на радость Богородицы.
Людие, рцем:благословен Пришедый,
Боже наш, слава Тебе!
Наверх
Благослови, душе моя, Господа,
Благословен еси, Господи
Благослови, душе моя, Господа
и вся внутренняя моя, Имя святое Его.
Благослови, душе моя, Господа
и не забывай всех воздаяний Его:
очищающаго вся беззакония твоя,
исцеляющаго вся недуги твоя,
избавляющаго от истления живот твой,
венчающаго тя милостию и щедротами,
исполняющаго во благих желание твое:
обновится яко орля юность твоя.
Щедр и милостив, Господь.
Долготерпелив и многомилостив.
Благослови, душе моя, Господа
и вся внутренняя моя Имя святое Его.
Благословен еси Господи
Наверх
Блажени, яже избрал
и приял еси, Господи,
и память их в род и род.
Наверх
Вертепе, благоукрасися, Агница бо грядет чревоносящи Христа:
ясли же подъимите словом Разрешившаго
от безсловеснаго деяния нас земнородных.
Пастырие свиряюще свидетельствуйте чудеси страшному:
и волсви от Персиды, злато и ливан и смирну Царю принесите,
яко явися Господь из Девы Матере.
Емуже и приникши рабски Мати поклонися,
и привещаше к держимому на объятиях Ея:
како всеялся еси Мне, или како прозябл еси во Мне,
Избавителю Мой и Боже?
Наверх
Вечери Твоея тайныя днесь,
Сыне Божий, причастника мя приими,
не бо врагом Твоим тайну повем,
ни лобзания Ти дам, яко Иуда,
но, яко разбойник, исповедаю Тя:
помяни мя, Господи,
во Царствии Твоем.
Наверх
Видящи Тя висима, Христе,
Тебе рождшая, вопияша:
что странное, еже вижу таинство, Сыне Мой?
Како на древе умираеши плотию водружен,
жизни подателю?
Наверх
Вознесыйся на Крест волею,
тезоименитому Твоему новому жительству,
щедроты Твоя даруй, Христе Боже,
возвесели нас силою Твоею,
победы дая нам на сопостаты,
пособие имущим Твое оружие мира,
непобедимую победу.
Наверх
Во царствии Твоем помяни нас, Господи,
егда приидеши во Царствии Твоем.
Блажени нищии духом, яко тех есть царство небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.
Блажени чистии сердцем, яко тии Бога узрят.
Блажени миротворцы, яко тии сынове Божии нарекутся.
Блажени изгнани правды ради,
яко тех есть Царство небесное.
Блажени есте, егда поносят вам,
и ижденут и рекут всяк зол глагол,
на вы лжуще Мене ради.
Радуйтеся и веселитеся,
яко мзда ваша многа на Небеси.
Наверх
Вскую мя отринул еси
от Лица Твоего, Свете Незаходимый,
и покрыла мя есть чуждая тьма окаяннаго,
но обрати мя, и к свету заповедей
Твоих пути моя направи, молюся
Наверх
Вся тварь изменяшася страхом,
зрящи Тя на Кресте висима, Христе;
солнце омрачашеся, и земли основания сотрясахуся,
вся сострадаху Создавшему вся.
Волею нас ради претерпевый, Господи, слава Тебе!
Наверх
Гласом моим ко Господу воззвах,
гласом моим ко Господу помолихся.
Пролию пред ним моление мое,
печаль мою пред ним возвещу.
Призри, услыши мя, Господи, Боже мой.
Просвети очи мои,
до не когда усну в смерть.
Вонми молению моему,
яко аз смирихся зело;
Наверх
Господи Сил, с нами буди, иного бо разве Тебе помощника
в скорбех не имамы, Господи Сил, помилуй нас.
Хвалите Бога во Святых Его,
хвалите Его во утвержении силы Его. (Припев: "Господи Сил, с нами буди"…)
Хвалите Его на силах Его,
хвалите Его по множеству величествия Его. (Припев)
Хвалите Его во гласе трубнем.
Хвалите Его во псалтири и гуслех (Припев)
Хвалите Его в тимпане и лице,
хвалите Его во струнах и органе (Припев).
Хвалите Его в кимвалех доброгласных,
хвалите Его в кимвалех восклицания:
всякое дыхание да хвалит Господа (Припев).
Хвалите Бога во Святых Его,
хвалите Его во утвержении силы Его (Припев).
Наверх
Господи, услыши молитву мою,
и вопль мой к тебе да приидет.
Не отврати лица твоего от менe;
в oньже аще день скорблю,
приклони ухо твое;
в oньже аще день призову тя,
скоро услыши мя.
Наверх
Дева днесь Пресущественнаго раждает,
и земля вертеп Неприступному приносит;
Ангели с пастырьми славословят,
волсви же со звездою путешествуют,
нас бо ради родися Отроча младо, превечный Бог.
Наверх
Да веселятся небесная, да радуются земная;
яко сотвори державу мышцею Своею Господь,
попра смертию смерть, первенец мертвых бысть,
из чрева адова избави нас,
и подаде мирови велию милость.
Наверх
Дивная и скорая помощнице
всем человеком, Мати Божия,
помози мне, недостойному,
душа бо моя грешная того восхоте.
Наверх
Днесь висит на Древе,
Иже на водах землю повесивый:
венцем от терния облагается,
Иже Ангелов Царь:
в ложную багряницу облачается,
Одеваяй небо облаки: заушение прият,
Иже во Иордане свободивый Адама:
гвоздьми пригвоздися Жених Церковный:
копием прободеся Сын Девы.
Покланяемся Страстем Твоим, Христе,
покланяемся Страстем Твоим, Христе,
покланяемся Страстем Твоим, Христе.
Покажи нам и славное Твое Воскресение.
Наверх
Днесь раждается от Девы всю Содержай тварь,
пеленами, якоже земен повивается,
Иже существом неприкосновенен Бог.
В яслех возлежит Утвердивый небеса словом в началех,
от сосцев млеком питается,
Иже в пустыни манну одождивый людем,
волхвы призывает Жених Церковный,
дары сих приемлет Сын Девы.
Покланяемся Рождеству Твоему, Христе,
покланяемся Рождеству Твоему, Христе,
покланяемся Рождеству Твоему, Христе,
покажи нам и Божественная Твоя Богоявления.
Наверх
Душа моя прегрешная, что не плачешься?
Ты плачь, душа, рыдай всегда:
Тем утешишься.
Не сможешь ты тогда плакати,
Когда приидет смерть.
Скинь одежду ты греховную в покаянии,
А не скинешь ты - грехи свои ада не минешь.
Страдалицы венцы носят на главах своих.
Они песни поют - ах - ангельские:
Аллилуия, аллилуия, аллилуия, аллилуия.
Наверх
Душе моя, душе моя,
востани, что спиши?
Конец приближается, и имаши смутитися;
воспряни убо, да пощадит тя Христос Бог,
везде сый и вся исполняй.
Наверх
Заступнице усердная, Мати Господа Вышняго,
за всех молиши Сына Твоего, Христа Бога нашего,
и всем твориши спастися,
в державный Твой покров прибегающих.
Всех нас заступи, о Госпоже Царице и Владычице,
иже в напастех и скорбех и в болезнех,
обремененных грехи многими,
предстоящих и молящихся Тебе
умиленною душею и сокрушенным сердцем
пред пречистым Твоим образом со слезами,
и невозвратно надежду имущих на Тя,
избавления всех зол, всем полезная даруй
и вся спаси, Богородице Дево:
Ты бо еси Божественный покров рабом Твоим.
Наверх
Единородный Сыне,
и Слове Божий, безсмертен Сый,
и изволивый спасения нашего ради воплотитися
от святыя Богородицы и Приснодевы Марии,
непреложно вочеловечивыйся,
распныйся же за ны, Христе Боже,
смертию смерть поправ,
Един сый Святыя Троицы,
спрославляемый Отцу и Святому Духу,
спаси нас.
Наверх
Изми мя, Боже, вопиет Россия.
От ядовита и лукава змия.
Его же ждаша адские запреты
бывшаво вожда Ивашка Мазепы.
Ах тяжко горесть терпе Мати бедна.
Утробу мою снедает ехидна.
Наверх
Искупил ны еси от клятвы законныя
честною Твоею кровию,
на кресте прегвоздився и копием прободся,
бессмертие источил еси человеком,
Спасе наш, слава Тебе.
Наверх
К Богородице прилежно ныне притецем,
грешнии и смиреннии и припадем,
в покаянии зовуще из глубины души:
Владычице, помози, на ны милосердовавши,
потщися, погибаем от множества прегрешений,
не отврати Твоя рабы тщи,
Тя бо и Едину Надежду имамы.
Наверх
Моливу пролию ко Господу
и Тому возвещу печали моя,
яко зол душа моя исполнися
и живот мой аду приближися,
и молюся, яко Иона:
от тли, Боже, возведи мя.
Наверх
Мученицы Твои, Господи,
во страданиих своих
венцы прияша нетленныя
от Тебе Бога нашего:
имуща бо крепость Твою,
мучителей низложиша,
сокрушиша и демонов немощныя дерзости.
Тех молитвами спаси души наша.
Наверх
На одре болезни лежащаго
и смертною раною уязвленнаго
посети, Милосерде, и исцели.
Ты бо един еси недуги и болезни
рода нашего понесый и вся многий
яко Многомилостив.
Милосерде, посети и исцели.
Наверх
На реках вавилонских,
тамо седохом и плакахом,
внегда помянути нам Сиона.
На вербиих посреде его обесихом органы наша.
Како воспоем песнь Господню на земли чужей?
Аще зубуду тебе, Иерусалиме,
забвена буди десница моя.
Дщи Вавилоня окаянная,
блажен иже воздаст тебе воздаяние твое,
еже воздала еси нам.
Блажен иже имет и разбиет
младенцы твоя о камень.
Наверх
Не рыдай Мене, Мати, зряще во гробе,
Его же во чреве без семени зачала еси Сына:
возстану бо и прославлюся и вознесу со славою,
непрестанно яко Бог, верою и любовию Тя величающия.
Наверх
Ныне отпущаеши раба Твоего, Владыко,
по глаголу Твоему, с миром:
яко видеста очи мои спасение Твое,
еже еси уготовал пред лицем всех людей,
свет во откровение языков
и славу людей Твоих Израиля.
Наверх
О Премилосердая Заступнице наша,
великия ради милости Твоея
даровавшая отечеству и граду нашему
чудотворную икону Твою
во освящение, утешение и ограждение наше,
нынешнее приемши славословие,
от всякаго злаго обстояния избави нас, рабы Твоя,
даруя нам здравие и спасение, на враги победу и одоление,
и всех нас вечных мук свободи,
устнами, душею же и сердцем вопиющих:
Аллилуия, аллилуия, аллилуия.
Наверх
Объятия Отча отверсти ми потщися,
блудно мое иждих житие,
на богатство неиждиваемое
взираяй щедрот Твоих, Спасе,
ныне обнищавшее мое да не презриши сердце.
Тебе бо, Господи, умилением зову:
согреших на Небо и пред Тобою.
Наверх
О, Всепетая Мати Царя Вышних сил,
Едина миру Радость и Ходатаица,
Надеждо наша Пресвятая Богородице,
Споручнице грешных, призри на ны малое сие моление
пред судьбоносною иконою Твоею смиренно приносящия.
Воздвигни руце Твои к Сыну Твоему в поручение о нас грешных,
прося прилежно покрыти нас Того милосердием
и Царствия Небесного наследники сотворити ны,
верно вопиющие Ему: Аллилуия, аллилуия, аллилуия.
Наверх
О, пресладкий и всещедрый Иисусе,
приими ныне малое моление сие наше,
якоже приял еси вдовицы две лепте,
и сохрани достояние Твое от враг видимых и невидимых,
от нашествия иноплеменник, от недуга и глада,
от всякия скорби и смертоносныя раны,
и грядущия изми муки всех, вопиющих Ти:
Аллилуия, аллилуия, аллилуия.
Наверх
О святыя и достохвальныя мученицы,
Веро, Надеждо и Любы, и мудрая мати Софие,
ныне приемше малое сие моление наше,
от всяких ны бед, болезней и скорбей
молитвами вашими избавите,
да сподобльшеся во Царствии Небеснем
зрети безсмертнаго Господа Иисуса,
с вами вкупе воспоем Ему:
Аллилуия, аллилуия, аллилуия.
Наверх
Плачуся и рыдаю, егда помышляю смерть,
и вижду во гробех лежащую
по образу Божию созданную нашу красоту,
безобразну и безславну, не имущу видения, ни доброты.
О чудо! Что сие еже о нас бысть таинство?
Како предахомся тлению и како сопрягохомся смерти?
Воистинну Бога повелением, якоже пише,
подающаго преставленным упокоение.
Наверх
Под Твою милость прибегаем, Богородице Дево,
молений наших не презри в скорбех,
но от бед избави нас, Едина чистая
и благословенная. Аминь.
Пресвятая Богородице, спаси нас.
Наверх
Покой, Спасе наш, с праведными рабы Твоя,
и сия всели во дворы Твоя, якоже есть писано,
презирая яко Благ прегрешения их, вольная и невольная,
и вся яже в ведении и не ведении, Человеколюбче.
От Девы возсиявый миру, Христе Боже,
и сыны света Тою показавый, помилуй нас.
Наверх
Покаяния отверзи ми двери,
Жизнодавче, утренюет бо дух мой
ко храму Святому Твоему,
храм носяй телесный весь осквернен,
но яко щедр очисти
благоутробною Твоею милостию.
И ныне и присно, и во веки веков, аминь.
На спасения стези настави мя, Богородице,
студными бо окалях душу грехами,
и в лености все житие мое иждих,
но Твоими молитвами
избави мя от всякия нечистоты.
Помилуй мя, Боже,
по велицей милости Твоей,
и по множеству щедрот
Твоих очисти беззаконие мое.
Множества содеянных мной лютых
помышляя, окаянный, трепещу
страшного дне суднаго:
но надеяся на милость
благоутробия Твоего,
якоже Давид вопию Ти:
помилуй мя, Боже,
по велицей Твоей милости.
Наверх
Помышляю день страшный
и плачу деяний моих лукавых,
како отвещаю Безсмертному Царю?
Или коим дерзновением воззрю на Судию, блудный аз?
Благоутробный Отче, Сыне Единородный,
Душе Святый, помилуй мя.
Наверх
Приидите, ублажим Иосифа приснопамятного,
в нощи к Пилату пришедшего,
и Живота всех испросившего:
даждь ми Сего странного,
Иже не имеет где главы подклонити;
даждь ми Сего странного,
Егоже ученик лукавый на смерть предаде;
даждь ми Сего странного,
Егоже Мати зрящи на кресте висяща,
рыдающи вопияше, и матерски восклицаше:
увы Мне, Чадо Мое! увы Мне, Свете Мой
и утроба Моя возлюбленная!
Симеоном бо предреченное в церкви днесь собыстся:
Мое сердце оружие пройде;
но в радость Воскресения Твоего плач преложи.
Поклоняемся страстем Твоим, Христе,
покланяемся страстем Твоим, Христе,
поклоняемся страстем Твоим Христе,
и Святому Воскресению.
Наверх
Разбойника благоразумнаго,
во едином часе раеви сподобил еси, Господи,
и мене древом крестным просвети и спаси мя.
Наверх
Рождество Твое, Христе Боже наш,
возсия мирови свет разума,
в нем бо звездам служащии
звездою учахуся Тебе кланятися, Солнцу правды,
и Тебе ведети с высоты Востока.
Господи, слава Тебе!
Наверх
Свете тихий Святыя славы,
Безсмертнаго Отца Небеснаго,
Святаго Блаженнаго, Иисусе Христе!
Пришедше на запад солнца,
Видевше свет вечерний,
Поем Отца, Сына и Святаго Духа, Бога.
Достоин еси Во вся времена
Пет быти гласы преподобными,
Сыне Божий, Живот даяй,
Тем же мир Тя славит.
Наверх
Свыше пророцы
Тя предвозвестиша Отроковице:
стамну жезл, скрижаль, кивот, свещник,
трапезу, гору несекомую, златую кадильницу
и скинию, дверь непроходную,
Палату и лестницу и престол царев.
Наверх
С вышних призирая, убогия приемля,
посети нас озлобленныя грехи,
Владыко Всемилостиве,
молитвами Богородицы
даруй душам нашим велию милость.
Наверх
Седе Адам прямо рая,
и свою наготу рыдая плакаше:
увы мне, прелестию лукавою
увещанну бывшу
и окрадену и славы удалену!
Увы мне, простотою нагу,
ныне же недоуменну! Но о раю,
ктому твоея сладости не наслаждуся:
ктому не узрю Господа
и Бога моего и Создателя:
в землю бо пойду, от неяже и взят бых.
Милостиве щедрый, вопию Ти:
помилуй мя падшаго.
Наверх
Се Жених грядет в полунощи,
и блажен раб, егоже обрящет бдяща:
недостоин же паки, егоже обрящет унывающа.
Блюди убо, душе моя, не сном отяготися,
да не смерти предана будеши,
и Царствия вне затворишися
но воспряни зувущи:
Свят, Свят, Свят, еси, Боже наш,
Богородицею помилуй нас.
Наверх
Скажи ми, Господи, кончину мою
и число дней моих, кое есть?
Да разумею, что лишаюся аз.
Се, пяди положил eси дни моя,
и состав мой яко ничтоже пред тобою;
oбаче всячeская суета всяк человек живый.
Убо образом ходит человек, oбаче всуе мятется;
сокровищствует, и не весть, кому соберет я.
Отстави от менe раны твоя;
от крепости бо руки твоея аз исчезох.
Услыши молитву мою, Господи, и моление мое внуши,
слез моих не премолчи.
Ослаби ми, да почию, прежде даже не отиду, и ктому не буду.
Наверх
Слава Тебе показавшему нам свет.
Слава в вышних Богу,
и на земли мир,в человецех благоволение.
Хвалим Тя, благословим Тя, кланяем Ти ся,
славословим Тя, благодарим Тя,
великия ради славы Твоея.
Господи Царю Небесный, Боже Отче Вседержителю,
Господи, Сыне Единородный, Иисусе Христе, и Святый Душе.
Господи Боже, Агнче Божий, Сыне Отечь,
вземляй грех мира, помилуй нас;
вземляй грехи мира, приими молитву нашу;
седяй одесную Отца, помилуй нас.
Яко Ты еси един Свят. Ты еси един Господь,
Иисус Христос, в славу Бога Отца, аминь.
На всяк день благословлю Тя,
и восхвалю имя Твое во веки, и в век века.
Сподоби, Господи, в день сей без греха сохранитися нам.
Благословен еси, Господи, Боже отец наших,
и хвально и прославлено имя Твое во веки, аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим.
Благословен еси, Господи, научи мя оправданием Твоим.
Благословен еси, Господи, научи мя оправданием Твоим.
Господи, прибежище был еси нам в род и род.
Аз рех: Господи, помилуй мя,
исцели душу мою, яко согреших Тебе.
Господи, к Тебе прибегох, научи мя творити волю Твою,
яко Ты еси Бог мой: яко у тебе источник живота,
во свете Твоем узрим свет.
Пробави милость Твою ведущим Тя.
Святый Боже, Святый Крепкий, Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Слава Отцу и Сыну и Святому Духу,
и ныне и присно и во веки веков. Аминь.
Святый Безсмертный, помилуй нас.
Святый Боже, Святый Крепкий, Святый Безсмертный,
помилуй нас.
Наверх
Совет превечный открывая Тебе, Отроковице,
Гавриил предста, Тебе лобзая и вещая:
Радуйся, земле ненасеянная!
Радуйся, купино неопалимая!
Радуйся, глубино неудобозримая!
Радуйся, мосте, к небесем преводяй,
и лествице высокая, юже Иаков виде!
Радуйся, божественная стамно манны!
Радуйся, разрешение клятвы!
Радуйся, Адамово воззвание,
с Тобою Господь!
Наверх
Совлекоша с Мене ризы Моя,
и облекоша Мя в ризу червлену,
возложиша на главу Мою венец от терний,
и в десную Мою руку вдаша трость,
да сокрушу их, яко сосуды скудельничи
Наверх
Тебе необоримую стену,
спасения утверждение,
Богородице Дево, молим:
сопротивных советы разори,
людей Твоих печаль на радость преложи,
град Твой огради, о мире мира моли,
яко Ты еси Богородице упование наше.
Наверх
Тебе одеющагося светом яко ризою
снем Иосиф с Древа с Никодимом,
и видев мертва нага непогребена,
благосердный плач восприим,
рыдая глаголаше:
увы мне, сладчайший Иисусе,
Егоже вмале солнце на Кресте
висима узревша мраком облагашеся,
и земля страхом колебашеся,
и раздирашеся церковная завеса:
но се ныне вижу Тя, мене ради
волею подъемша смерть.
Како погребу Тя Боже мой,
или какою плащаницею обвию?
коима ли рукама прикоснуся
нетленному Твоему телу?
или кия песни воспою
Твоему исходу Щедре,
величаю страсти Твоя,
песнословлю и погребение Твое
со Воскресением, зовый:
Господи слава Тебе.
Наверх
Умолкает ныне всякое уныние и страх отчаяния исчезает,
грешницы в скорби сердца обретают утешение
и Небесною любовию озаряются светло:
Днесь бо Матерь Божия простирает нам спасающую руку
и от Пречистаго образа Своего вещает, глаголя:
Аз Споручница грешных к Моему Сыну,
Сей дал Мне за них руце слышати Мя выну.
Темже людие, обремененнии грехи многими,
припадите к подножию Ея иконы со слезами, вопиюще:
Заступнице мира, грешных Споручнице!
Умоли Матерними молитвами Избавителя всех,
да Божественным всепрощением покрыет грехи наша
и светлыя двери райския отверзет нам,
Ты бо еси предстательство и спасение рода христианскаго!
Наверх
Умягчи наша злая сердца, Богородице,
и напасти ненавидящих Тебя угаси,
и всякую тесноту души нашея разреши;
на Твой бо святый образ взирающе,
Твоим страданием и милосердием о нас умиляемся
и раны Твоя лобызаем,
стрел же наших, Тя терзающих, ужасаемся.
Не даждь нам, Мати благосердая,
в жестокосердии нашем и от жестокосердия ближних погибнути,
Ты бо еси воистинну злых сердец умягчение.
Наверх
Утоли болезни многовоздыхающия души моея,
утолившая всяку слезу от лица земли:
Ты бо человеком болезни отгониши
и грешных скорби разрушаеши,
Тебе бо вси стяжахом
надежду и утверждение,
Пресвятая Мати Дево.
Наверх
Ученик Учителя соглашаше цену,
и на тридесятих сребреницех продаде Господа,
лобзанием льстивым предая Его
беззаконником на смерть
Днесь глаголаше Зиждитель небесе
и земли Своим учеником:
приближися час, и приспе Иуда предаяй Мене,
да никтоже отвержется Мене, видя Мя на Кресте
посреде двою разбойнику;
стражду бо яко человек,
и спасу яко Человеколюбец в Мя верующия.
Неизреченно в последняя заченшая,
и рождшая Создателя Твоего,
Того моли спастися душам нашим.
Наверх
Хвали, душе моя, Господа.
Восхвалю Господа в животе моем,
пою Богу моему , дондеже есмь.
Не надейтеся на князи, на сыны человеческия,
в них же несть спасения.
Изыдет дух его,
и возвратится в землю свою:
и той день погибнут вся помышления его.
Блажен, емуже Бог Иаковль помошник его,
упование его на Господа Бога своего,
сотворшаго небо и землю,
море и вся, яже в них;
хранящаго истину в век,
творящего суд обидимым,
дающаго пищу алчущим.
Господь решит окованныя;
Господь умудряет слепцы;
Господь возводит низверженныя;
Господь любит праведники;
Господь хранит пришельцы,
сира и вдову приимет,
и путь грешных погубит.
Наверх
Хвалите имя Господне
Аллилуия, аллилуия, аллилуия.
Благословен Господь от Сиона
Аллилуия, аллилуия, аллилуия.
Исповедайтеся Господеви,
яко благ, яко в век милость Его.
Аллилуия, аллилуия, аллилуия.
Исповедайтеся Богу Небесному,
яко в век милость Его.
Аллилуия, аллилуия, аллилуия.
Наверх
Царице моя преблагая, надеждо моя Богородице,
приятелище сирых и странных предстательница,
скорбящих радосте, обидимым покровительнице!
Зриши мою беду, зриши мою скорбь,
помози ми яко немощну, окорми мя яко странна.
Обиду мою веси, разреши ту, яко волиши:
яко не имам иныя помощи разве Тебе,
ни иныя предстательницы,
ни благия утешительницы, токмо Тебе, о Богомати,
яко да сохраниши мя и покрыеши во веки веков. Аминь.
Наверх
Чертог Твой вижду, Спасе мой, украшенный,
и одежды не имам, да вниду вонь:
просвети одеяние души моея, Светодавче,
и спаси мя.
Наверх
Явися мне милосерд,
святый Ангел Господень,
хранителю мой,
и не отлучайся от мене сквернаго,
но просвети мя светом неприкосновенным
и сотвори мя достойна Царствия Небеснаго.
Наверх




Ангеле Божий

Ангельския предыдите силы

Благослови, душе моя, Господа

Блажени, яже избрал

Вертепе, благоукрасися,

Вечери Твоея тайныя днесь,

Видящи Тя висима, Христе

Вознесыйся на Крест волею

Во царствии Твоем

Вскую мя отринул еси

Вся тварь изменяшася страхом

Гласом моим ко Господу воззвах

Господи Сил, с нами буди

Господи, услыши молитву мою

Единородный Сыне

Да веселятся небесная

Дева днесь Пресущественнаго раждает

Дивная и скорая Помощнице

Днесь висит на Древе

Днесь раждается от Девы

Душа моя прегрешная

Душе моя

Заступнице усердная

Изми мя, Боже,

Искупил ны еси от клятвы законныя

К Богородице прилежно ныне притецем

Моливу пролию ко Господу

Мученицы Твои, Господи,

На одре болезни

На реках вавилонских

Не рыдай Мене, Мати,

Ныне отпущаеши раба Твоего, Владыко

Объятия Отча

О, Всепетая Мати

О Премилосердая Заступнице наша

О, пресладкий и всещедрый Иисусе

О святыя и достохвальныя мученицы,

Плачу и рыдаю

Под Твою милость

Покаяния отверзи ми двери

Покой, Спасе наш, с праведными

Помышляю день страшный

Приидите, ублажим Иосифа

Разбойника благоразумнаго

Рождество Твое, Христе Боже наш,

Свете тихий

Свыше пророцы

С вышних призирая

Седе Адам

Се Жених грядет в полунощи

Скажи ми, Господи, кончину мою

Слава Тебе показавшему нам свет

Совет превечный

Совлекоша с Мене ризы Моя

Тебе необоримую стену

Тебе одеющагося светом яко ризою

Умолкает ныне всякое уныние

Умягчи наша злая сердца, Богородице

Утоли болезни

Ученик Учителя соглашаше цену

Хвали, душе моя, Господа

Хвалите имя Господне

Царице моя преблагая

Чертог Твой вижду, Спасе мой

Явися мне милосерд